«Шампунь» деп шатасқан Хусанов Гвардиоламен сөзге келіп қалды
Абдукодир Хусанов. Фото: Getty Images
Қыста «Манчестер Ситиге» ауысқан өзбек қорғаушысы Абдуқодир Хусанов Англиядағы мансабын әлі бастамай жатып, командадан кетуі мүмкін. Себебі ол бас бапкер Хосеп Гвардиоламен келіспей қалған. Бұл туралы Real Talk Manchester City басылымы хабарлады.
Журналистердің жазуынша, бәрі наурыз айында өткен бір жаттығуда болған. Гвардиола Хусановтың ойынын ұнатып, оған «Сен чемпионсың» деген. Ал Абдуқодир ағылшыншасы жетпей, жауап ретінде «Сен де чемпионсың» деудің орнына «Сен шампуньсың» деп қойған.
Оны әзіл деп қабылдаған Гвардиола бұдан кейін қорғаушыны алаңға шығармауға шешім қабылдапты. Командадағы Рубен Диаш жағдайды түсіндіруге тырысқанымен, испан маман райынан қайтпаған. Қазір футболшының агенттері оған жаңа клуб іздеп жатыр.
