Самат Смақов павлодарлық «Ертістің» тізгінін ұстайды
Самат Смаков. Фото: kff.kz
Қазақстан ұлттық құрамасының бұрынғы капитаны Самат Смақов жуырда павлодарлық «Ертіс» футбол клубын басқарады, деп хабарлайды Pin-UpSport.kz. Ақпарат көздеріне сәйкес, маман мен клуб басшылығы арасындағы келіссөздер сәтті өтіп, тараптар ортақ шешімге келген. Нәтижесінде Смақов клубтың спорттық құрылымындағы негізгі басшылық қызметке тағайындалмақ.
Бұл тағайындаудың символдық мәні де бар. Самат Смақов – павлодар футболының төл түлегі, кәсіби мансабын дәл осы «Ертіс» сапында бастаған. Ол ойыншы ретінде де, кейінгі жылдары функционер ретінде де клубпен тығыз байланысын сақтап келді. 2018–2019 жылдары Смақов «Ертістің» бас директоры қызметін атқарып, команданың ұйымдастырушылық және басқару жұмыстарына тікелей араласқан.
«Ертіс» клубының тарихы қазақстандық футболда айрықша орын алады. 1965 жылы құрылған павлодарлық ұжым ел чемпионатында бес рет топ жарған, соңғы чемпиондық атақ 2003 жылы тіркелген. Алайда 2020 жылы клуб ауыр қаржылық қиындықтарға тап болып, маусым ортасында чемпионаттан шығып қалуға мәжбүр болды. Ал 2022 жылдың қыркүйегінде клуб ресми түрде банкрот деп танылып, кәсіби футболдан уақытша шет қалды.
Клубты қайта жаңғырту жұмыстары 2023 жылы басталды. 2024 жылғы маусымда «Ертіс» Екінші лигада өнер көрсетсе, 2025 жылдың қорытындысы бойынша Қазақстан Премьер-лигасына қайта оралды. Самат Смақовтың тағайындалуы клубтың тұрақтану және жүйелі даму жолындағы маңызды қадам ретінде бағаланып отыр. Алдағы уақытта жаңа басшылықтан команданың ұзақмерзімді даму стратегиясын қалыптастырып, павлодар футболының беделін қайта көтеру күтіледі.
Айбар Рысдаулет
Зинедин Зидан 2026 жылдан кейін Франция құрамасын басқаруға дайын
UFC аса жеңіл салмақ дәрежесіндегі рейтингті жаңартты: Алмабаев өз орнын сақтап қалды