Қазақстан спортында тағы да допинг дауы: төрт спортшы жазаланды
Иллюстративное фото: rbc.ru
Қазақстанның Ұлттық допингке қарсы орталығы төрт спортшыға қатысты жаңа шешім шығарды. Олардың қатарында грэпплингтен екі дүркін әлем чемпионы Самат Айтпанбет те бар. 2024 жылы Астанада өткен әлем чемпионатында оның сынамасынан тыйым салынған «Дростанолон» мен «Кломифен» табылып, ол үш жылға жарыстан шеттетілді (3 желтоқсан 2024 – 2 желтоқсан 2027).
Сонымен қатар, 2023 жылғы Азия Пара ойындарының жүлдегері, дзюдошы Ерлан Конкиев те жазаланды. Ол бірнеше рет тест тапсырудан бас тартқандықтан, екі жылға спорттан аластатылды (1 ақпан 2025 – 1 ақпан 2027).
Шымкенттік зілтемірші Бекболат Қалиұлы допинг сынамасынан кейін төрт жылға (24 желтоқсан 2024 – 24 желтоқсан 2028) шеттетілсе, оның командаласы Аслан Бурхановқа үш жылға дисквалификация (21.02.2025 – 21.02.2028) берілді.
Қазіргі таңда КазНАДЦ тізімінде 95 спортшы мен 4 жаттықтырушы бар. Ең көп тәртіп бұзу жағдайы ауыр атлетикада тіркелген – 37 спортшы мен 2 бапкер. Сонымен бірге пауэрлифтинг пен жеңіл атлетикада да көп допинг деректері анықталған.
