Қазақстан құрамасы бокстан 2025 жылғы әлем чемпионатын алты медальмен аяқтады
Сакен Бибосынов. Фото: olympic.kz
Қазақстан ұлттық құрамасы Дубай қаласында өткен бокстан 2025 жылғы әлем чемпионатындағы өнерін қорытындылады, деп хабарлайды Pin-UpSport.kz.
IBA аясында ұйымдастырылған жаһандық дода қазақстандық боксшылар үшін әркелкі өтті. Турнирдің алғашқы кезеңдері бірқатар спортшылардың ерте жеңілісімен есте қалса, кейінгі айналымдарда команда нәтижені түзеп, медальдық көрсеткішке қол жеткізді.
Чемпионат барысында жүлдесіз қалған боксшылар да болды. Атап айтқанда, 51 келіге дейінгі салмақта Даниял Сабит, 60 келіде Серик Теміржанов, 67 келіде Санатали Төлтаев, сондай-ақ 81 келіде Ерасыл Жақпеков, 86 келіде Даулет Төлемісов, 92 келіде Нұрмағамед Юсупов және аса ауыр салмақта Нұрлан Сапарбай турнирді ерте аяқтады. Бұл жекпе-жектер алғашқы күндердегі жалпы көрініске өз әсерін тигізді.
Соған қарамастан, Қазақстан құрамасы шешуші кезеңдерде жоғары деңгейде өнер көрсетіп, алты медаль олжалады. Әлем чемпионы атағын 54 келіде Сакен Бибосынов, 57 келіде Оразбек Асылқұлов және 71 келіде Абылайхан Жүсіпов жеңіп алды. 75 келіге дейінгі салмақта Сабыржан Аққалықов күміс жүлдені иеленді. Ал 48 келіде Теміртас Жүсіпов пен 63,5 келіде Ертуған Зейнуллинов қола медальға қол жеткізді.
Жалпы алғанда, Дубайдағы әлем чемпионатына Қазақстан құрамасынан 13 боксшы қатысып, оның алтауы жүлдегер атанды. Бұл нәтиже ұлттық құраманың әлеуетін көрсетіп қана қоймай, алдағы халықаралық жарыстарға дайындық барысында ескерілуі тиіс маңызды тұстарды айқындап берді.
Айбар Рысдаулет
Сабыржан Аққалықов Дубайдағы IBA әлем чемпионатында күміс жүлдеге ие болды
Дубайдағы ӘЧ-2025: Қазақстан құрамасының медальдары үлкен сыйақымен толықты