Қазақстан әлемдік теннистің ең үздік үш мемлекетінің бірі атанды
Елена Рыбакина. Фото: Пресс-служба ФТК
Қазақстан әлемдік теннис элитасындағы орнын ресми түрде бекітті. Бүгінде еліміз ерлер (ATP) мен әйелдер (WTA) арасындағы жаһандық рейтингтің Топ-10 тізіміне бірдей енген әлемдегі үш мемлекеттің біріне айналды. Қазіргі таңда мұндай бірегей нәтижеге Қазақстаннан бөлек тек АҚШ пен Италия ғана ие болып отыр.
Бұл тарихи жетістік ұлттық құрама көшбасшыларының толайым табыстарының нәтижесі. Еліміздің бірінші ракеткасы Елена Рыбакина 2026 жылдың басында WTA рейтингінде 5-ші орынды сенімді түрде сақтап, жоғары деңгейдегі тұрақтылығын дәлелдеп келеді. Ерлер арасында Александр Бублик тарихи рекорд орнатты. Гонконгта өткен ATP 250 турнирінде жарқын жеңіске жетіп, мансабындағы тоғызыншы титулын иеленген ол әлемдік рейтингте 10-шы сатыға көтерілді. Бұл еліміздің ерлер теннисі тарихындағы тұңғыш көрсеткіш.
Александр Бублик Гонконгтағы ATP-250 турнирінің чемпионы атанды
Жекелеген жетістіктермен қатар, Қазақстан командалық деңгейде де әлемдік держава мәртебесін растап отыр. Әйелдер құрамасы «Билли Джин Кинг Кубогының» рейтингінде әлемдегі ең үздік 10 ұжымның қатарына кіреді.
