«Қайрат» драмалық матчта Чемпиондар лигасының үшінші іріктеу кезеңіне шықты
Алматылық «Қайрат» УЕФА Чемпиондар лигасының екінші іріктеу кезеңіндегі қарымта матчта Кипрдің «Омония» клубын жеңіп, турнирдің келесі кезеңіне жолдама алды, деп хабарлайды Pin-UpSport.kz.
Алматыдағы Орталық стадионда өткен кездесу «Қайраттың» 1:0 есебіндегі жеңісімен аяқталды. Матчтағы жалғыз голды 37-минутта Эдмилсон соқты. Алғашқы ойында «Омония» дәл осындай есеппен жеңіске жеткендіктен, жеңімпаз қосымша уақытта және пенальти сериясында анықталды.
Қосымша уақытта кипрлік клуб Андроникос Какулли мен Сену Кулибалидің алаңнан қуылуынан кейін тоғыз ойыншымен қалды. Алайда «Қайрат» сан басымдығын пайдалана алмады. Пенальти сериясында алматылық футболшылар дәлдігімен ерекшеленіп, 6:5 есебімен жеңіске жетті.
Осылайша, «Қайрат» Чемпиондар лигасының үшінші іріктеу кезеңіне шықты. Келесі кезеңде қазақстандық клуб Болгарияның «Левски» және Румынияның «Университатя Крайова» командалары арасындағы жұптың жеңімпазымен кездеседі.
