«Ордабасы» Жасұлан Әмірге Ресей мен Түркия клубтарынан ұсыныс болғанын растады
«Ордабасы» клубының президенті Дархан Қызайбаев шабуылшы Жасұлан Әмірге шетелдік клубтар қызығушылық танытып отырғанын мәлімдеді, деп хабарлайды Pin-UpSport.kz.
Клуб басшысының айтуынша, 19 жастағы футболшыға Ресейдің «Балтикасы» мен Түркияның «Истанбул Башакшехир» клубтарынан ұсыныстар түскен. Алайда әзірге бұл нұсқалар ойыншы мен клубтың талаптарына толық сәйкес келмеген.
Қызайбаевтың сөзінше, Жасұлан Әмірдің басты мақсаты – биыл «Ордабасы» сапында Қазақстан чемпионы атану. Маусым аяқталғаннан кейін клуб басшылығы, футболшы және оның әкесі болашаққа қатысты шешімді бірге қабылдайды. Егер шымкенттік клуб Чемпиондар лигасына жолдама алса, Әмірдің командада қалу мүмкіндігі де қарастырылады.
Жасұлан Әмір – «Ордабасының» түлегі. Биылғы Қазақстан Премьер-лигасында ол 17 матч өткізіп, жеті гол соғып, төрт нәтижелі пас берді. Сонымен қатар биыл маусым айында Арменияға қарсы жолдастық кездесуде Қазақстан құрамасы сапында дебют жасады.
