Михаил Шайдоров әлем чемпионатының күміс жүлдегері атанды
Михаил Шайдоров
Бостонда өткен мәнерлеп сырғанаудан әлем чемпионатында Қазақстан атынан сынға түскен Михаил Шайдоров күміс жүлдегер атанды. Қысқа бағдарламадан кейін үшінші тұрған ол еркін бағдарламада сәтті сырғанап, бір саты жоғары көтерілді.
Шайдоров еркін бағдарламада 192.70 ұпай алды — бұл оның жеке рекорды. Жалпы есепте де 287.47 ұпаймен (тағы бір рекорд) екінші орынға тұрақтады. Алтын медальді тағы да АҚШ спортшысы Илья Малинин (318.56) жеңіп алды. Жапониялық Юма Кагияма (278.19) үздік үштікті түйіндеді.
Бұл — Михаилдің ересектер арасындағы әлем чемпионатындағы ең үздік көрсеткіші. Бұған дейін ол жастар арасындағы әлем біріншілігінде күміс алған, биылғы маусымда Азия ойындарында үшінші орын иеленіп, Төрт құрлық чемпионатында топ жарған еді.
Енді Шайдоров 2026 жылғы Олимпиадаға қатысу үшін қажет нормативті орындап отыр. Ол үшін Бостондағы әлем чемпионатында үздік 24-тікке ену керек болатын. Қазір ISU тарапынан ресми тізімді жариялау күтіліп отыр.
