Магомед Адиев «Атырауға» келе ме, әлде РПЛ-ға қайта орала ма?
Магомед Адиев. Фото: UEFA via Getty Images
Қазақстан құрамасының бұрынғы бас бапкері Магомед Адиев алдағы уақытта қайтадан клуб тізгінін ұстауы мүмкін. Бұл жолы оның алдында екі таңдау тұр: Қазақстанның «Атырауы» немесе Ресей Премьер-лигасындағы «Пари НН». Бұл туралы ресейлік инсайдер Иван Карпов жазды.
Ақпаратқа сәйкес, Адиев қазір «Атыраумен» белсенді келіссөздер жүргізіп жатыр. Сонымен қатар, ол «Пари НН» клубының бапкерлікке басты үміткері саналады. Егер 12 сәуір күні «Нижний Новгород» өз алаңында «Динамодан» жеңілсе, Виктор Гончаренко орнын босатып, оның орнына Адиев тағайындалуы мүмкін.
Айта кетейік, Адиев Қазақстан құрамасын 2022–2024 жылдары басқарды. Оның кезінде ұлттық құрама Ұлттар лигасындағы тобында жеңіске жетіп, Еуро-2024 жолдамасына таласқан болатын. Сондай-ақ, ол 2021–2022 жылдары «Шахтер» (Қарағанды) клубын жаттықтырды.
Қазіргі таңда «Атырау» төрт турдан кейін бір-ақ жеңіске жетіп, турнир кестесінде оныншы орында тұр. Ал «Пари НН» Ресей чемпионатында 14-орында. Сондықтан Адиевтің нақты қай клубты таңдайтыны алдағы күндері белгілі болмақ.
