Кейн қос гол соқты, ПСЖ «Аталантаны» таптады, ал «Ливерпуль» соңғы минутта жеңісті жұлып алды

17 қыркүйек, сәрсенбі күні Чемпиондар лигасында бірден алты матч өтті, деп хабарлайды Pin-UpSport.kz.

Алматылық «Қайраттың» топтағы қарсыластары — «Олимпиакос» пен «Пафос» — тең түсті. Кипрлік клуб бірінші тайм ортасында азшылықта қалса да, есепті сақтап қалды — 0:0.

ПСЖ титулды қорғауды сенімді бастады: «Аталантаны» 4:0 есебімен ойсырата жеңді. Гол авторлары — Маркиньос, Кварацхелия, Мендеш және Рамуш. Мюнхенде Харри Кейн дубль жасап, «Челсиге» қарсы матчта шешуші рөл атқарды — 3:1.

Ең тартысты ойын Англияда өтті: «Ливерпуль» алғашқы минуттарда 2:0 есебімен алға шықты, бірақ Льорентенің қос голынан кейін есеп теңескен еді. Дегенмен қосымша уақытта Ван Дейк баспен соғып, жеңісті «қызылдарға» әкелді — 3:2.

Сонымен қатар, «Интер» Амстердамда «Аяксты» 2:0 есебімен тізе бүктірді (екі голды Тюрам соқты). Ал «Будё/Глимт» Прагада соңғы минутта гол соғып, «Славиямен» тең тарқасты — 2:2.

Ертең, бейсенбі күні тағы алты кездесу өтеді. Соның ішінде жанкүйерлер асыға күткен «Спортинг» пен «Қайраттың» ойыны бар.