Kazakhstan Open жарысының алғашқы күні Қазақстан таеквондошылары 38 медаль жеңіп алды
Астанада Kazakhstan Open-2025 G1 халықаралық таеквондо турнирі басталды, деп хабарлайды Pin-UpSport.kz.
Алғашқы күні ересектер арасындағы жүлделер сарапқа салынып, Қазақстан құрамасы жоғары нәтиже көрсетті.
Еліміздің қоржынына он алтын түсті. Олардың иегерлері – Еркебұлан Енсегенов (54 кг), Жавохирхан Исламов (58 кг), Нұрбек Газез (68 кг), Бекасыл Ергеш (74 кг), Батырхан Төлеуғали (80 кг), Бейбарыс Каблан (+87 кг), Айдана Құмартаева (46 кг), Нодира Ахмедова (53 кг), Нұрай Құсайынова (67 кг) және Назым Махмудова (73 кг).
Күміс жүлдені 12 спортшы жеңіп алды, қатарында Бекзод Қадырқұлов, Елдос Ысқақ және Рита Бакишева бар. Тағы 16 таеквондошы қола медаль иегері атанды. Алдағы екі күнде жарыс кадеттер мен жасөспірімдер арасында жалғасады. Бәсеке Жақсылық Үшкемпіров атындағы жекпе-жек сарайында өтуде.
