«Кайраттың» жас шабуылшысы Еуропа мен Ресей клубтары қызығушылық танытуда
Исмаил Бекболат. Фото: kff.kz
«Кайрат» пен Қазақстанның жасөспірімдер құрамасының шабуылшысы Исмаил Бекболат биыл жазда шетелдік клубтардың біріне ауысуы мүмкін. Былтырдан бері Еуропа мен Ресей скауттарының назарына іліккен 17 жастағы шабуылшыға қазір нақты қызығушылық байқалып отыр.
Исмаил биылғы маусымды сәтті бастап, «Кайрат» сапында бес ойынға қатысып үлгерді, көбінесе алаңға қосалқы құрамнан шықты. Сондай-ақ, «Кайрат-Жастар» командасында үш матч өткізіп, екі гол соғып, екі нәтижелі пас берді. Бірақ оның басты жетістігі – жасөспірімдер арасындағы Еуропа чемпионатына іріктеу кезеңіндегі ойындары. Грузия қақпасына бір гол соғып, Литваға қарсы хет-трик жасады. Жалпы, ұлттық құрамада тоғыз ойын өткізіп, бес голдың авторы атанды.
«Кайратта» Исмаилдың болашағына үлкен сенім артады. Клуб өкілдері оны Дастан Сатпаевпен салыстырып, ерекшелігі – сол аяқпен ойнауы екенін айтады. Биыл «Кайрат» шетелге тағы бір талантын сатуы мүмкін. Бұған дейін клуб «Челсиге» Сатпаевты рекордтық келісімшартпен сатқан болатын.
