«Кайрат» шабуылшысынан айырылды: Жоао Пауло жарақат алды
Жоао Пауло. Фото: vesti.kz
Алматылық «Кайраттың» бразилиялық шабуылшысы Жоао Пауло ауыр жарақат алып, ұзақ уақытқа алаңнан тыс қалатын болды. Vesti.kz дерегінше, футболшы тізесіндегі айқыш сіңірлерін үзген. Енді тәжірибелі ойыншыны ұзақ оңалу кезеңі күтіп тұр. Жасына қарай, оның «Кайраттағы» болашағы бұлыңғыр, тіпті мансабын аяқтауы мүмкін деген әңгімелер бар.
Айта кетсек, бұған дейін де команда Элдер Сантананың жарақатына байланысты шабуылда бір ойыншысынан айырылған еді. Сол себепті клуб жазда жаңа форвард іздеуге кіріспек.
Осы маусымда Жоао Пауло бес ресми матч өткізіп, бір гол соқты. Жалпы, ол «Кайрат» сапында 112 ойынға қатысып, 47 гол мен 24 нәтижелі пас берген. Бразилиялық шабуылшы алматылық клубпен бірге Қазақстан чемпионатын, Кубогын және Суперкубогын жеңіп алған.
