Ғалымжан Кенжебек: «Бұл мен үшін өте маңызды әрі ерекше матч болды»
Галымжан Кенжебек. Фото: КФФ
Қазақстан құрамасының қорғаушысы Ғалымжан Кенжебек Солтүстік Македонияға қарсы өткен ойында ұлттық құрама сапындағы дебютін өткізді. Кездесуден кейін ол pin-upsport.kz тілшісіне матч жайлы өз пікірін білдірді.
«Бұл мен үшін өте ерекше және маңызды ойын болды. Ұлттық құраманың бапкерлеріне үлкен рақмет – маған сенім білдіріп, алаңға шығуға мүмкіндік берді. Өкінішке қарай, жеңіске жете алмадық. Жақсы ойнағанымызбен, нәтиже болмады. Дегенмен бұл кездесуден көп тәжірибе алдық», – деді қорғаушы.
Сондай-ақ Кенжебек ұлттық құрамамен қоштасқан капитан Асхат Тағыбергенге алғысын білдірді.
«Иә, Асхат ағамыздың құрамамен қоштасқаны өкінішті. Ол біз үшін тек капитан емес, нағыз тұлға болды. Барлығымыз оны сағынамыз. Әрдайым үлгі көрсетіп, қолдау білдіріп жүретін», – деді ол.
Айта кетейік, бұл матч Ғалымжан Кенжебек үшін Қазақстан құрамасы сапындағы алғашқы ойын болды.
