Франция Германияны жеңіп, Ұлттар лигасының қола жүлдегері атанды
Фото: Getty Images
Франция құрамасы Ұлттар лигасының үшінші орны үшін өткен матчта Германияны жеңді. Штутгарт қаласындағы ойын 2:0 есебімен аяқталды. Франция сапынан Килиан Мбаппе мен Майкл Олисе гол соқты.
Бұл Мбаппенің ұлттық құрамадағы 50-ші голы. Ол бұл көрсеткіш бойынша Франция тарихында үшінші орында тұр. Тьерри Анриде – 51, ал көш басында Оливье Жиру – 57 голмен.
Ойын барысында VAR екі рет шешуші рөл атқарды. Бірінші таймда Франция қақпасына белгіленген пенальти қайта қаралып, жойылды. Ал екінші таймда Германия ойыншысы Дениз Ундав соққан гол төреші Иван Кружляктың шешімімен есепке алынған жоқ.
Франция тарихында алғаш рет Ұлттар лигасының қола медалін иеленді. Айта кетейік, Дидье Дешам жаттықтыратын бұл команда 2021 жылы аталмыш турнирде чемпион атанған еді. Ал финалда Португалия мен Испания құрамалары кездеседі.
