Ермахан Орынтаев LFA ұйымындағы дебютінде алғаш рет жеңіліс тапты
Фото: Naiza
Қазақстандық ММА спортшысы Ермахан Орынтаев АҚШ-тағы Legacy Fighting Alliance (LFA) промоушенінде алғашқы жекпе-жегін өткізіп, америкалық Адриан Гарсияға жол берді, деп хабарлайды Pin-UpSport.kz. Қазақстандық файтердің дебюті Коннектикут штатындағы Машантакет қаласында өткен LFA 222 турнирінде өтті.
Орынтаев үшін бұл турнирге қатысу кәсіби мансабындағы маңызды белес болды. Бұған дейін ол бес жекпе-жек өткізіп, барлығында жеңіске жеткен. Ал америкалық қарсыласы Адриан Гарсия тәжірибесі мол спортшылардың бірі саналады: оның активінде тоғыз жеңіс болып, АҚШ-тағы аймақтық ұйымдарда бірнеше рет өнер көрсеткен.
Жекпе-жек небәрі 36 секундқа созылды. Гарсия алғашқы мүмкіндіктердің бірінде дәл оң қолымен соққы жасап, Орынтаевты нокдаунға түсірді. Одан кейін партерде шабуылды жалғастырған америкалыққа төреші уақытында араласып, кездесуді тоқтатты. Нәтижесінде жекпе-жек Гарсияның нокаутпен жеңісі ретінде тіркелді.
Бұл нәтиже Ермахан Орынтаевтың кәсіби мансабындағы алғашқы жеңіліс болды. Оның қазіргі көрсеткіші — бес жеңіс және бір жеңіліс. Ал Адриан Гарсия оныншы жеңісіне қол жеткізіп, рекордын 10-3-1 нәтижесіне жеткізді. Алдағы кезеңде Орынтаев өткен жекпе-жектен қажетті қорытынды жасап, халықаралық аренадағы келесі қадамын анықтауы қажет.
Айбар Рысдаулет
Ангелина Лукас Каирде өткен титулдық жекпе-жекте кәсіби рингтегі екінші жеңілісін қабылдады
Михаил Шайдоров Лейк-Плэсидте өткен Skate America кезеңінде үшінші орын алды