Бибісара Асаубаева Сен-Тропедегі блиц турнирінде күміс медаль жеңіп алды
Фото: ФШК
Қазақстандық шахматшы Бибісара Асаубаева Францияның Сен-Тропе қаласында өткен WR Women’s Chess Tour 2026 еуропалық кезеңінің блиц турнирінде күміс медаль иеленді, деп хабарлайды Pin-UpSport.kz. Финалда қазақстандық шахматшы украиналық Анна Музычукке есе жіберіп, жарысты екінші орынмен аяқтады.
Финалға дейін Асаубаева екі тартысты кезеңнен өтті. Ширек финалда ол Украина өкілі Мария Музычукпен кездесті. Негізгі екі партияда да жеңімпаз анықталмай, қарсыластар тең түсті. Сондықтан келесі кезеңге шығатын шахматшы «Армагеддон» партиясында анықталды. Бұл шешуші ойында қазақстандық шахматшы қарсыласынан басым түсіп, жартылай финалға жолдама алды. Келесі кезеңде оның қарсыласы германиялық Элизабет Петц болды.
Жартылай финал Асаубаева үшін сәтсіз басталды. Екі партиядан кейін ол Петцтен 0,5:1,5 есебімен ұтылып жатты. Алайда Бибісара есепті теңестіріп, шешуші «Армагеддон» партиясына мүмкіндік алды. Қосымша ойында да қазақстандық шахматшы жеңіске жетіп, финалға шықты. Чемпиондық атақ үшін ол Анна Музычукпен кездесті. Асаубаева алғашқы партияда жеңіске жеткенімен, украиналық шахматшы екінші партияда жауап қайтарды. Үшінші партия тең аяқталып, жеңімпазды анықтау үшін төртінші кездесу өткізілді. Қара түспен ойнаған Асаубаева бұл партияда жеңіліп қалды.
Осылайша, Анна Музычук финалда 2,5:1,5 есебімен жеңіске жетіп, бірінші орынға ие болды, ал Бибісара Асаубаева блиц турнирінің күміс жүлдегері атанды. Бұл қазақстандық шахматшының Сен-Тропедегі кезеңдегі екінші жүлдесі болды. Бір күн бұрын Асаубаева рапид турнирінде жеңіске жетіп, алтын медаль иеленген еді.
