Бибісара Асаубаева алғаш рет ФИДЕ рейтингінің үздік бестігіне енді
Фото: NurPhoto
Қазақстандық шахматшы Бибісара Асаубаева мансабындағы маңызды белестердің біріне қол жеткізіп, әйелдер арасындағы ФИДЕ рейтингінің алғашқы бестігіне алғаш рет енді, деп хабарлайды Pin-UpSport.kz. Маусым айындағы жаңартудан кейін 22 жастағы спортшы өз көрсеткішін жақсартып, әлемдегі ең мықты шахматшылар қатарына қосылды.
Жаңартылған рейтинг қорытындысы бойынша Асаубаева екі сатыға жоғарылап, бесінші орынға тұрақтады. Қазақстандық шахматшының еншісінде 2537,6 рейтингтік ұпай бар. Соңғы бір айда ол өз көрсеткішіне 10,6 ұпай қосты. Мұндай өсімге халықаралық жарыстардағы табысты нәтижелері мен маусым бойғы тұрақты ойыны әсер етті.
Әлемдік рейтингтің көш басында қытайлық Хоу Ифань қалып отыр. Оның көрсеткіші – 2596 ұпай. Екінші орында 2566 ұпаймен Лэй Тинцзе орналасқан. Ал үздік төрттікке қазіргі әлем чемпионы Цзюй Вэньцзюнь (2559,6) мен Чжу Цзиньэр (2549,6) кіреді. Осылайша Бибісара әлемдік шахматтағы жетекші спортшылардың қатарына жақындай түсті.
Қазақстанның өзге шахматшылары да жоғары орындарда тұр. Алуа Нұрман 2435 ұпаймен 27-орында болса, Меруерт Камалиденова 2400,4 ұпай жинап, 49-сатыға жайғасқан. Еске салсақ, жуырда Бибісара Асаубаева беделді Norway Chess Women 2026 турнирінің жеңімпазы атанып, халықаралық аренадағы тағы бір маңызды жетістікке қол жеткізген болатын.
