Бекхэм мен Невилл бірігіп бір клуб сатып алды
Дэвид Бекхэм. Фото: Getty Images
Дэвид Бекхэм мен Гари Невилл Англияның төртінші дивизионындағы «Солфорд Сити» клубын сатып алып, жаңа консорциум құрамына қосылды. Manchester Evening News ақпаратына сенсек, бұл топқа Consello консалтинг компаниясының негізін қалаушысы Деклан Келли мен Лондон теннис қауымдастығының төрағасы лорд Мервин Дэвис те кіреді. Сондай-ақ Dream Sports Group секілді Үндістанның ірі спорттық технологиялық компаниясы да инвесторлар қатарында.
Консорциум клубты дамытуға 15–20 миллион доллар (шамамен 11–15 миллион фунт) инвестиция құймақ. Қаражат спорттық және инфрақұрылымдық жобаларға жұмсалады. Басты мақсат — «Солфордты» алдағы бес жылда Чемпионшипке шығару.
Алайда жаңа иелер клубтың күнделікті жұмысын басқармайды. Бұл үшін жаңа бас директор тағайындалады. Соңғы жылдары клуб төрт мәрте жоғары лигаға көтерілгенімен, 2019 жылы EFL-ге шыққаннан бері Лига 2 плей-оффына жолдама ала алмай жүр.
«Интер Майамидің» де иесі болып саналатын Бекхэм «Солфордтың» өз өмірінде орны ерекше екенін айтып, енді оның дамуына үлес қосатынына қуанышты екенін жеткізді.
