Бауыржан Исламхан «Астанаға» қайта оралды
Фото: КФФ
Жартылай қорғаушы Бауыржан Исламхан маусым соңына дейін елордалық «Астана» клубымен келісімшартқа қол қойды, деп хабарлайды Pin-UpSport.kz.
Футболшы бұл клубтың намысын осыған дейін де қорғаған. 2013 жылы жарты маусым ойнап, 8 кездесуге қатысқан болатын.
Клуб президенті Саян Хамитжановтың айтуынша, Исламхан жарақатынан толық айықпаған. Сол себепті қазіргі таңда командаға тікелей көмектесе алмайды. Дегенмен клуб оның кәсіби деңгейіне сенеді және бабына келуіне толық жағдай жасауға дайын.
«Біз оған уақыт керек екенін түсінеміз. Қазір ол біздің мақсаттарымызды орындауға тікелей көмектесе алмайды. Соған қарамастан, оның жоғары деңгейдегі футболшы екеніне еш күмәніміз жоқ», — деді «Астана» клубының басшысы Саян Хамитжанов.
«Астана» Исламханға өз бабын қайта табуға, жасыл алаңға оралып, жанкүйерлерді қуантуға мүмкіндік бермек.
