«Атырау» клубы қаржылық тексерістен өтіп жатыр
ФК «Атырау». Фото: Kazfootball.kz
«Атырау» футбол клубының қаржылық ахуалына жүргізілген аудиттің алғашқы нәтижелері белгілі болды. Жыл басында клуб қайтадан мемлекет қарамағына өткен болатын. Қазір барлық қаржы шығындары тендер арқылы өтеді, ал бақылау облыстық спорт басқармасының құзырында.
Ерекше назар легионерлер мен әкімшілік қызметкерлердің жалақысына аударылған. Бюджеттен шетелдік ойыншыларға ақша төлеуге тыйым салынғанымен, клуб сегіз легионермен келісімшарт жасап үлгерген. Құжат жүзінде олардың айлығы 200 мың теңге болып көрсетілсе, іс жүзінде үш миллион теңгеге дейін жеткен. Сонымен қатар, бапкерлер мен әкімшілік құрам жалақыларын бірнеше есеге көтеріп алған. Ал команда футболшылары қаңтардан наурызға дейін еңбекақы алмаған.
Бұған қоса, клуб УЕФА-дан келетін қаражатты алдын ала есепке алып, екі несие рәсімдеген – бірі 25 миллион, екіншісі 73 миллион теңге. Бірінші қарыз қайтарылды, ал екінші қаржы спорттық құрал-жабдық алуға жұмсалған. Бұл келісім бойынша да тексеріс әлі аяқталған жоқ. Билік өкілдері «Атыраудың» мемлекеттік мекеме ретіндегі мәртебесі уақытша екенін айтып отыр – жыл соңына дейін клубты қайтадан жеке инвестордың қарауына беру жоспарланып отыр.
Айбар Рысдаулет
Азияны дүбірлеткен жастар: Қазақстан былғары қолғап шеберлері 22 алтынмен оралды