Асу Алмабаев UFC-де өзбек файтерімен кездеседі
Асу Алмабаев. Фото: PX Imagens via ZUMA Press Wire
Қазақстандық UFC спортшысы Асу Алмабаевтың бапкері Эдуард Базров Sports.kz сайтына берген сұхбатында шәкірті өзбекстандық Рамазан Темировпен айқасатынын растады.
«Иә, бұл ақпарат рас. Кеше бізге қарсылас туралы хабарлады», — деді бапкер.
Бұл жекпе-жек 26 шілде күні Абу-Дабиде өтетін UFC on ABC 9 турнирінде өтпек. 31 жастағы Алмабаев соңғы жекпе-жегінде UFC кешінің басты айқасында өнер көрсеткен алғашқы қазақстандық атанған еді, бірақ Манель Капеден жеңілген. Қазіргі таңда оның ММА-дегі көрсеткіші — 21 жеңіс, 3 жеңіліс, UFC-де — 4 жеңіс пен 1 жеңіліс.
28 жастағы Темировтың кәсіби рекорды — 19 жеңіс, 3 жеңіліс. UFC-де ол екі мәрте жеңіске жеткен. Айта кетерлігі, Рамазан бұған дейін үш рет қазақстандық қарсыластармен айқасқан: 2019 жылы Талғат Жұмағалиевтен жеңіліп, 2021 жылы Жұмағалиев пен Сатбек Есенгельдинді ұтқан.
Қазір UFC рейтингінде Алмабаев сегізінші орында тұрса, Темиров 13-орында. Бұл кездесу жанкүйерлер үшін аса тартысты әрі қызықты болары анық.
