Асхат Тағыберген құрамамен қош айтысты: «Енді жастарға жол беру керек»
Фото: PA Images via Getty Images
Қазақстан ұлттық құрамасының капитаны Асхат Тағыберген құрама сапындағы мансабын аяқтағанын жариялады. Бұл шешімін ол Солтүстік Македониямен өткен ойында мәлім етті.
«Бұл – менің құрамадағы соңғы ойыным. Мұндай шешімді өзім қабылдадым. Барша жанкүйерлерге алғысым шексіз. Мен құрамада алғаш рет 2014 жылы ойнадым. Осы 11 жыл бойы қолдау білдіргендеріңізге рақмет. Ұлттық құраманың бір бөлігі болып, капитан болу – үлкен мәртебе. Әрине, жастарға жол беру керек. Мен олардың құраманы Еуро мен әлем чемпионатына алып шығатынына сенемін. Алға, Қазақстан», – деді Тағыберген.
Ол ұлттық құрамада 63 матч өткізіп, 3 гол соқты және 7 нәтижелі пас берді. Бұл кездесу ойыншы үшін қоштасу матчы болды.
Сол күні Қазақстан құрамасы 2026 жылғы әлем чемпионатының іріктеу кезеңіндегі алғашқы үй матчында Солтүстік Македониядан 0:1 есебімен жеңілді.
