Александр Бублик US Open қарсаңында ATP рейтингінде екі сатыға төмендеді
Қазақстандық теннисші Александр Бублик ATP рейтингінің жаңартылған нұсқасында екі сатыға төмендеп, US Open турнирі алдында әлемнің 13-ракеткасы атанды. Оның қоржынында 2525 ұпай бар, деп хабарлайды Pin-UpSport.kz.
Бұған дейінгі әлемдік рейтингте Бублик 11-орында тұрған. Өткен кезеңде қазақстандық спортшы 10 рейтингтік ұпайынан айырылып, нәтижесінде бірден екі сатыға төмендеді. Соңғы апталарда Бублик Канада мен АҚШ-та өткен бірнеше турнирге қатысқан жоқ. Теннисшінің жарыстардағы үзілісіне отбасылық және коммерциялық жағдайлар себеп болды. Соның салдарынан ол бұған дейін жинаған ұпайларының бір бөлігін қорғай алмады.
Рейтингтегі төмендеуге қарамастан, Бублик Қазақстанның бірінші ракеткасы мәртебесін сақтап қалды. Қазақстандық басқа теннисшілер арасында Александр Шевченко 89-орында, Тимофей Скатов 149-сатыда, Михаил Кукушкин 333-орында, Бейбіт Жұқаев 425-сатыда, ал Денис Евсеев 444-орында келеді.
Әлемдік рейтинг көшін италиялық Янник Синнер 13 450 ұпаймен бастап тұр. Испаниялық Карлос Алькарас 8160 ұпаймен екінші орында, ал Германия өкілі Александр Зверев 8090 ұпаймен үздік үштікті түйіндейді. Осылайша, Бублик маусымдағы соңғы «Үлкен дулыға» турнирін әлемнің 13-ракеткасы ретінде бастайды. Нью-Йорктегі US Open жарысы қазақстандық теннисшіге рейтингтегі жоғалтқан позицияларын қайтаруға мүмкіндік береді.
