Абиба Әбужақынова әлемдік рейтингте үздік үштікке кірді
Абиба Абужакынова. Фото: Getty Images
Қазақстандық дзюдошы Абиба Әбужақынова Душанбе қаласында өткен Grand Slam турнирінен кейін әлемдік рейтингте үштікке көтерілді.
48 келіге дейінгі салмақта қола жүлде иеленген Абиба халықаралық дзюдо федерациясының (IJF) рейтингінде алтыншы орыннан үшінші орынға көтерілді. Бұл нәтиже – Қазақстан құрамасының атынан жарысқа қатысқан спортшылар арасындағы ең жоғары көрсеткіш болды.
Турнирде Абиба жартылай финалда Қытай спортшысы Вен Жуангқа есе жібергенімен, қола медаль үшін белдесуде өзбекстандық Улбусин Хакимованы жеңіп кетті. Ал қалған жеті қазақстандық дзюдошы – бәрі ерлер – жүлделі орынға жете алмады.
Бұл – Әбужақынованың мансабындағы Grand Slam турнирлеріндегі тоғызыншы жүлдесі. Биылғы жылы ол екінші рет жүлдегер атанып отыр: бұған дейін наурыз айында Линцте алтын алған болатын.
