Шавкат Рахмонов жыл соңына дейін октагонға оралмақ
Шавкат Рахмонов. Фото: Zuffa LLC
UFC-де жеңіліп көрмеген қазақстандық файтер Шавкат Рахмонов биылғы жылдың соңына дейін жекпе-жекке оралу жоспары бар екенін айтты.
Оның сөзінше, қазіргі уақытта жарақатын емдеп жатыр. Қараша не желтоқсан айларында қайтып келуді көздейді.
«Бәрі жағдайыма байланысты. Дайын болсам, шығамын».
Қарсылас таңдауға келгенде, Шавкат титул үшін айқасқысы келетінін жасырмады. Дегенмен, талапкерлік жекпе-жекке де қарсы емес. Ол тіпті Ислам Махачев пен Джек Делла Маддалена арасындағы жұптың жеңімпазымен де кездесуге дайын екенін жеткізді.
«Қазірше менің ойымда – титул үшін айқас. Ислам Махачев Джек Делла Маддаленаға қарсы шығады… Маған бәрібір. Қаласақ, талапкерлік жекпе-жек те болады. Кім болса да, бастысы – өзімнің дайын болуым», – деді Рахмонов UFC Eurasia-ға берген сұхбатында.
Айта кетейік, Рахмонов соңғы жекпе-жегін былтыр желтоқсанда өткізіп, ирландиялық Иэн Гэрриді төрешілер шешімімен жеңген болатын.
