2025 жылғы Клубтық әлем чемпионатын кім ұтады?
ПСЖ. Фото: Getty Images
15 тамыз күні Клубтық әлем чемпионаты ресми түрде басталды. Бұрын жай ғана маусымаралық турнир саналған жарыс енді мүлде басқа деңгейге шықты – қатысушылар саны артты, жүлде қоры көбейді, ал көрермен қызығушылығы тіпті күшейді. Турнирге 32 команда қатысады. Жарыс топтық кезеңнен басталып, плей-оффпен аяқталады. Ендеше, басты фавориттерді саралап көрейік.
«Реал» Мадрид – жаңа бапкермен жаңа кезең
Өткен маусымда трофей жағынан «Реалдың» жолы болмады. Карло Анчелотти кетіп, орнына «Байермен» керемет нәтиже көрсеткен Хаби Алонсо келді. Команда жаңарып жатыр: құрамда – тәжірибелі ойыншылар да, жаңа жұлдыздар да бар. Мысалы, Трент Александер-Арнолд пен Дин Хёйсен биыл ғана келді. Ал Модрич бұл турнирде ақтық рет алаңға шығуы мүмкін.
Жалпы алғанда, «Реалдың» осындай форматтағы жарыстардағы тәжірибесі мол. Сондықтан олар финалға дейін жетеді деуге толық негіз бар.
Фото: Getty Images
«ПСЖ» – тұрақты және мықты команда
Луис Энрике жаттықтыратын париждіктер өткен маусымда Чемпиондар лигасын жеңіп алған болатын. Құрам толығымен сақталған. Дембеле, Кварацхелия сияқты ойыншылар орнында. Жас талант Габриэль Москардо да арендадан оралды.
«ПСЖ» — шабуылда да, қорғаныста да өте жүйелі ойнайтын команда. Сондықтан бұл жарыста олар кемінде жартылай финалға дейін жетуі тиіс.
«Манчестер Сити» – ақталуға соңғы мүмкіндік
Пеп Гвардиола үшін бұл турнир өте маңызды. Себебі «Сити» өткен маусымды трофейсіз аяқтады. Команда чемпиондықтан ерте айырылып, Чемпиондар лигасынан да, Англия кубогынан да шығып қалды.
Жазда бірқатар маңызды трансферлер жасалды. Рейндерс, Шерки және Аит-Нури секілді ойыншылар команданы күшейтті. Родри жарақатынан айығып, қатарға қосылды. Ал Кевин Де Брюйне кеткенімен, жаңа маусымға дайын «Сити» – өте қауіпті қарсылас.
Фото: Getty Images
«Бавария» – тәжірибенің үлгісі
Компани баптайтын «Бавария» біршама тұрақсыз маусым өткізгенімен, құрамында тәжірибе жеткілікті. Мюллер, Кейн, Сане сияқты ойыншылар әлі де жоғары деңгейде ойнай алады. Әсіресе бұл жарыс – Мюллер үшін де, клуб үшін де маңызды сынақ.
Тағы кімнен үміт күтеміз?
«Интер Майами» — Лионель Месси бастаған жұлдызды құраммен келіп отыр. Команданың MLS-тағы ойыны тұрақсыз болса да, тәжірибелі ойыншылар кез келген матчты шешіп кетуі мүмкін. «Аль-Хилал» да осал емес: Митрович, Савич, Кулибали сынды мықтылар бар.
Айбар Рысдаулет
Стадион бар, стандарт жоқ: Қазақ футболының инфрақұрылымдағы күйі
Өзбекстан құрамасы Аргентинамен жолдастық матч өткізеді