Олимпиада-2026: Милан мен Кортина жаңа форматтағы ойындарға дайындалып жатыр
NurPhoto via Getty Images
2026 жылы өтетін қысқы Олимпиада ойындарына дайындық қызу жүріп жатыр. Осыған байланысты Халықаралық Олимпиада комитеті мен «Милан–Кортина 2026» ұйымдастыру комитеті бірлесіп семинар өткізді. Оған 78 елдің ұлттық Олимпиада комитеті мен 33 Паралимпиада ұйымының өкілдері қатысты. Қазақстан атынан спорт департаментінің басшысы Бектұр Қиятбай мен халықаралық қатынастар департаментінің директоры Анара Сыздықова барды.
Семинар барысында қонақтарға Олимпиадаға дайындық барысы таныстырылды. Атап айтқанда, спорт нысандары мен Олимпиада ауылдарының жай-күйі, атлеттердің тұру жағдайы, жарыс орындарына қатынау, қауіпсіздік шаралары мен әлеуметтік желіге қатысты ережелер сөз болды. Ұйымдастырушылардың айтуынша, 2026 жылғы ойындарға 3500-ден астам спортшы қатысады. Жарыстарда 195 медаль жиынтығы сарапқа салынады. Ал ски-альпинизм алғаш рет Олимпиада бағдарламасына енбек.
Милан қаласы Олимпиаданың басты орталығы болады. Онда мәнерлеп сырғанау, шайбалы хоккей, шорт-трек пен коньки жарыстары өтеді. Ал тау шаңғысы, сноуборд пен шаңғы қоссайысы сияқты басқа спорт түрлері Кортина, Вальтеллина және Валь-ди-Фьемме кластерлерінде ұйымдастырылады. Бұл жолғы Олимпиаданың ерекшелігі — ашылу салтанаты бір мезетте төрт жерде өтеді. Олимпиада алауы бірден екі қалада — Милан мен Кортинеде тұтатылады. Негізгі шоу Миландағы әйгілі «Сан-Сиро» стадионында болады.
Бектұр Қиятбайдың айтуынша, Олимпиадаға дайындық кестеге сай жүріп жатыр. Миландағы Олимпиада ауылының құрылысы бітуге жақын. Кейін бұл нысан студенттерге арналған жатақхана ретінде пайдаланылады. Ал ойындардың жабылу рәсімі Веронада өтпек.
