Қадырбек Шынбаев ММА-дан Азия ойындарының чемпионы атанды
Қазақстандық спортшы Қадырбек Шынбаев Айти мен Нагояда өтіп жатқан XX жазғы Азия ойындарында алтын медаль жеңіп алды. ММА-дан заманауи стильдегі 71 келіге дейінгі салмақ дәрежесінің финалында ол Тәжікстан өкілі Бехруз Хуршедшодуды 3:0 есебімен жеңді, деп хабарлайды Pin-UpSport.kz.
Шынбаев финалға дейін ширек және жартылай финалдық кезеңдерден өтті. Ширек финалда қазақстандық спортшы Бахрейн өкілі Құрбан Идрисовты жеңсе, жартылай финалда Өзбекстан спортшысы Нодирбек Шавкатовтан басым түсті. Осылайша, Қадырбек Шынбаев турнирді бірде-бір жеңіліссіз аяқтап, өз салмағында Азия ойындарының чемпионы атанды.
Шынбаевтың алтыны Қазақстанның осы Азия ойындарындағы ММА турниріндегі екінші алтын медалі болды. Бұған дейін дәстүрлі стильде 77 келіге дейінгі салмақта Еркинғали Бүркіталин чемпион атанған еді. Ал 65 келіге дейінгі салмақта дәстүрлі стильде өнер көрсеткен Санжар Әділов Қазақстан құрамасына қола медаль әкелді.
Осылайша, Қазақстан спортшылары ММА Азия ойындарының бағдарламасына алғаш рет енгізілген турнирде үш медаль жеңіп алды. Жапонияның Айти префектурасы мен Нагоя қаласында өтіп жатқан XX жазғы Азия ойындары 19 қыркүйекте басталып, 4 қазанға дейін жалғасады.
