ММА, бокс және каратэ – 22 қыркүйекте Қазақстан үшін маңызды жарыстар өтеді
22 қыркүйекте Қазақстан құрамасы Аичи-Нагоеде өтіп жатқан XX жазғы Азия ойындарындағы жарыстарын жалғастырады. Бұл күні қазақстандық спортшылар бірнеше спорт түрінен сынға түседі. Негізгі назар ММА финалдарына, каратэ, бокс және жүзуден өтетін жарыстарға аударылады, деп хабарлайды Pin-UpSport.kz.
Қазақстандық спортшылардың жарыс күніндегі алғашқы старттары Астана уақытымен 05:00-де басталады. Осы уақытта академиялық ескек есу, әйелдер арасындағы тас жол веложарысы және жағажай волейболындағы аралас жұптар бәсекесі өтеді. 05:30-да ерлер және әйелдер арасындағы бадминтоннан командалық жарыстар басталса, 05:45-те пневматикалық винтовкадан аралас командалар сайысқа түседі. 06:00-де стенд атудан, семсерлесуден, каратэден, волейболдан, үстел теннисінен және жүзуден жарыстар жалғасады. Осы уақытта Қазақстан әйелдер құрамасы 5×5 баскетболдан Гонконгпен ойнайды. Жүзушілер 100 метрге еркін әдіспен, 200 метрге баттерфляй әдісімен және 4×100 метр аралас эстафетада сынға түседі.
07:55-те ерлер арасында пневматикалық винтовкадан жарыс жалғасады. 08:00-де Қазақстан боксшылары 51 және 54 келіге дейінгі салмақ дәрежелерінде, сондай-ақ спорттық гимнастика өкілдері жарысқа кіріседі. 09:30-да әйелдер құрамасы гандболдан Вьетнаммен кездеседі. Ал 10:00-де ММА турнирінің шешуші жекпе-жектері өтеді. Қазақстан ерлер арасында modern стилінде 71 келіге дейінгі, traditional стилінде 65 және 77 келіге дейінгі салмақтарда, сондай-ақ әйелдер арасында modern стилінде 54 келіге дейінгі санатта өнер көрсетеді. Алтын жүлде үшін Қадырбек Шынбаев пен Еркинғали Бүркіталин күреседі. Шынбаев Филиппин өкілі Жан-Клод Саклагпен кездессе, Бүркіталин Бахрейн спортшысы Мұхаммад Набиевке қарсы финалдық жекпе-жек өткізеді.
Күннің екінші жартысында да Қазақстан өкілдерінің жарыстары жалғасады. 10:30-да әйелдер құрамасы су добынан Таиландпен, 11:00-де ерлер гандбол құрамасы Кувейтпен ойнайды. 13:00-де ерлер арасында 75 келіге дейінгі салмақта каратэ, 55 келіге дейінгі салмақта бокс және жүзуден жарыстар өтеді. 13:20-да семсерлесу бәсекелері жалғасады. 13:40-та әйелдер құрамасы 3×3 баскетболдан Қытаймен кездеседі. 14:00-де ерлер және әйелдер арасында ушу-саньда жарыстары басталып, 15:45-те Қазақстанның ерлер құрамасы 3×3 баскетболдан Шри-Ланкамен ойнайды. XX жазғы Азия ойындары 4 қазанға дейін жалғасады.
