Алуа Нұрман әлемдік рейтингте екінші орынға көтерілді
Қазақстандық шахматшы Алуа Нұрман Халықаралық шахмат федерациясының (FIDE) 20 жасқа дейінгі қыздар арасындағы жаңартылған рейтингінде екінші орынға көтеріліп, көшбасшыға жақындай түсті, деп хабарлайды Pin-UpSport.kz.
19 жастағы шахматшы соңғы есептік кезеңде рейтингтік көрсеткішін 12,7 ұпайға арттырды. Осыдан кейін Нұрманның рейтингі 2455 ұпайға жетіп, әлемдік тізімде бірден екінші орынға көтерілді. Қазақстандық спортшы бірнеше қарсыласын басып озып, бірінші орынға таласатын мүмкіндікке ие болды. Рейтинг көшін украиналық Анастасия Гнатышин бастап тұр. Оның еншісінде 2462,4 ұпай бар. Алайда соңғы жаңартуда Гнатышин 2,6 ұпай жоғалтқан. Үшінші орында 2443 ұпай жинаған ресейлік Анна Шухман орналасқан.
Алуа Нұрман Қазақстанның жас шахматшылары арасында жоғары нәтижелерімен танылып жүрген спортшылардың бірі. Оның мансабындағы маңызды жетістіктердің қатарында 2024 жылы Будапештте өткен шахмат Олимпиадасындағы нәтижесі бар. Нұрман Қазақстан құрамасының сапында 45-ші шахмат Олимпиадасының күміс жүлдегері атанды. Тамыз айының ортасында қазақстандық шахматшы Анкарада өткен халықаралық жарысқа да қатысты. Турнир қорытындысы бойынша ол әйелдер тақтасында ойнаған спортшылар арасындағы жеке есепте екінші орын алды.
Қазақстанның тағы бір танымал шахматшысы Бибісара Асаубаева да әлемнің үздік бестігіндегі орнын сақтап қалды. FIDE ұйымының қыркүйектегі жаңартылған рейтингінде Асаубаева 2536 ұпаймен бесінші орында тұр. Соңғы есептік кезеңде оның көрсеткіші екі ұпайға төмендегенімен, бұл өзгеріс үздік бестіктен шығуына әсер еткен жоқ. Ал Алуа Нұрман бірінші орынға небәрі 7,4 ұпай жетпей тұр. Осылайша, қазақстандық шахматшы жасөспірімдер арасындағы әлемдік рейтингтің көшін бастауға жақын қалды.
