Дэнис Рахмоновтың жарақаты туралы пікір айтты
Фото: Getty Images
Америкалық файтер Диллон Дэнис Шавкат Рахмоновтың жарақаты UFC-дегі жағдайға қалай әсер еткенін айтты, деп хабарлайды Pin-UpSport.kz.
Оның айтуынша, қазақстандық спортшының октагоннан екі жылға жуық уақытқа шет қалуы бірнеше дивизиондағы оқиғалардың өрбуіне айтарлықтай әсер еткен. Дэнис «Номадтың» жарақаты чемпиондық жарыс пен көптеген файтердің мансабына ықпал еткенін атап өтті.
«Бір адамның жарақаты бүкіл спорттағы жағдайды қалай өзгерткеніне сену қиын. Егер Шавкат Рахмонов тізесін жарақаттамағанда, Ислам басқа салмаққа өтпес еді, Джастин чемпион болмас еді, Илия екінші белбеуін алмауы мүмкін еді, Джек Делла Маддалена чемпион атанбас еді, Йен Гэрри титул үшін жұдырықтаспас еді – бұл әлі бәрі емес. Қандай спорт!» – деп жазды Дэнис әлеуметтік желіде.
Еске салайық, 2024 жылдың желтоқсанында Рахмонов Йен Гэрриді жеңіп, оның мансабындағы алғашқы жеңілісін тіркеген еді. Сол жекпе-жекте қазақстандық тізесінен жарақат алып, кейін екі рет операция жасатты. Қазіргі мәлімет бойынша, оның октагонға оралуы 2027 жылдың басына жоспарланып отыр.
