Қазақстан УЕФА коэффициенттер рейтингіндегі 36-орнын сақтап қалды
Еурокубоктардың алғашқы іріктеу кезеңінің қарымта матчтарынан кейін Қазақстан УЕФА коэффициенттер рейтингіндегі 36-орнын сақтап қалды, деп хабарлайды Pin-UpSport.kz.
Қазақстан клубтарының ішінен ең сәтті нәтиже көрсеткен – алматылық «Қайрат». Ел чемпионы сырт алаңда Черногорияның «Сутьескасын» 2:0 есебімен жеңіп, екі матчтың қорытындысы бойынша 4:1 нәтижесімен Чемпиондар лигасының екінші іріктеу кезеңіне өтті. Ал «Астана» мен «Елімай» Лига конференциясындағы жарыс жолын аяқтады. Елордалық клуб Албанияның «Динамо Ситиіне» (жалпы есеп – 2:4), ал семейлік команда Арменияның «Алашкертіне» (жалпы есеп – 3:3, пенальтиден – 5:6) есе жіберді.
Қазіргі таңда Қазақстанның УЕФА рейтингіндегі көрсеткіші – 11,875. Бұл нәтижемен еліміз 36-орында тұр. Қазақстаннан жоғары Босния және Герцеговина (12,718) мен Косово (12,406) орналасса, төменде Латвия (11,500), Финляндия (11,250) және Молдова (10,000) келеді.
Чемпиондар лигасының екінші іріктеу кезеңінде «Қайрат» Кипрдің «Омония» клубымен кездеседі. Матчтар 22 және 29 шілдеде өтеді. Ал «Тобыл» Лига конференциясының екінші іріктеу кезеңінде Литваның «Паневежис» командасымен ойнайды. Бұл кездесулер 23 және 30 шілдеге жоспарланған.
