Бибісара Асаубаева ФИДЕ-нің лайв-рейтингінде төртінші орынға көтерілді
Фото: ФШК
Қазақстандық шахматшы Бибісара Асаубаева Norway Chess Women-2026 турниріндегі сәтті ойынының арқасында ФИДЕ-нің әйелдер арасындағы лайв-рейтингінде жоғарылады, деп хабарлайды Pin-UpSport.kz.
Ослодағы турнирдегі соңғы партиялардан кейін 22 жастағы қазақстандық спортшының рейтингі 2537,7 ұпайға жетті. Жарыс барысында Бибісара 10,7 рейтингтік ұпай қосып, бірден үш сатыға көтерілді.
Осының нәтижесінде қазақстандық шахматшы әйелдер арасындағы лайв-рейтингте төртінші орынға жайғасты.
Әлемдік рейтингтің көшін қытайлық Хоу Ифань бастап тұр – 2596,0 ұпай. Екінші орында Лэй Тинцзе (2566,0), ал үшінші сатыда қазіргі әлем чемпионы Цзюй Вэньцзюнь (2560,5) орналасқан.
Бибісараның үздік үштікке дейінгі арақашықтығы 23 рейтингтік ұпайға да жетпейді.
Сонымен қатар Асаубаева Norway Chess Women-2026 турнирінде де көшбасшылықты сақтап келеді. Жеті турдан кейін оның еншісінде 12,5 ұпай бар. Бұл көрсеткіш ең жақын қуғыншы – үндістандық Дивья Дешмухтан төрт ұпайға жоғары.
