Бибісара Асаубаева Norway Chess турнирінде қайтадан жеке көш бастады
Фото: ФШК
Қазақстандық шахматшы Бибісара Асаубаева Ослода өтіп жатқан беделді Norway Chess турнирінде қайтадан жеке дара көшбасшы атанды, деп хабарлайды Pin-UpSport.kz.
Алтыншы турда қазақстандық спортшы Үндістан өкілі Хампи Конерумен кездесті. Негізгі партия жылдам тең нәтижемен аяқталып, жеңімпаз «армагеддонда» анықталды.
Қосымша партияда ақ тастармен ойнаған Бибісара жеңіске жетіп, маңызды ұпайларға ие болды.
Алты турдан кейін Асаубаеваның еншісінде 9,5 ұпай бар. Осы нәтижемен ол турнир кестесінде жеке дара бірінші орынға көтерілді. Оған ең жақын қарсылас – 8,5 ұпай жинаған үндістандық Дивья Дешмух.
Үздік үштікті сегіз ұпаймен украиналық Анна Музычук түйіндеп тұр. Ол қосымша көрсеткіштер бойынша қазіргі әлем чемпионы қытайлық Цзюй Вэньцзюньнен алда келеді.
Norway Chess турнирі 5 маусымға дейін жалғасады. Жарыс бағдарламасы он турдан тұрады.
