«Футболшы кез келген жаста дамуы керек». Аслан Дарабаев мансабы мен жаңа сынақ туралы
«Тұран» клубы мен Қазақстан ұлттық құрамасының жартылай қорғаушысы Аслан Дарабаев Pin-UpSport.kz сайтына берген сұхбатында Түркістан командасына не үшін келгенін, ұлттық құрамадағы әсерлі сәттерін және 36 жаста да жоғары деңгейде ойнауға не көмектесетінін айтып берді.
— Қазір сіз «Тұран» сапындасыз. Бұл клубты таңдауға не әсер етті және өзіңізге қандай мақсат қойдыңыз?
— Негізгі себеп – Түркістан қаласы. Бұл – тарихы терең, мәдениеті бай өңір. Соңғы жылдары аймақ қарқынды дамып жатыр, ал футбол командасы да сол рухқа сай болуы керек деп ойлаймын. Клуб басшылығымен сөйлесіп, олардың даму бағытымен танысқан соң, осы жобаның бір бөлігі болуға және қиын сәтте көмектесуге шешім қабылдадым.
— Сіз «Қайрат», «Тобыл», «Астана» секілді елдегі мықты клубтарда ойнадыңыз. Солардың ішінде сіз үшін ең есте қалған кезең қайсысы?
— Шынын айтсам, әр кезеңнің өз орны бар. Әр клубта да үйренгенім көп, әр жерде өз жолым мен тәжірибем қалыптасты. Біреуін бөліп айту қиын – бәрі де мен үшін маңызды мектеп болды.
— Қазақстан құрамасында 20-дан астам матч өткіздіңіз. Сол уақыттан қандай естеліктер ерекше есте қалды? Құрамаға қайта оралғыңыз келе ме?
— Ұлттық құраманың жейдесін кию – ерекше сезім. Бұл – мақтаныш, эмоция, жауапкершілік. Ең жарқын естеліктер – Конференция лигасындағы кезең. Сол кезде команданың рухы, жеңістер, атмосфера бәрі ерекше болатын. Ал енді шақырту туралы айтсам – бәрі бапкерлердің шешімі. Егер шақырса, әрине, қуана көмектесемін.
— 36 жаста болсаңыз да, әлі де сұраныстағы жартылай қорғаушысыз. Жасыңызбен бірге ойыныңыз қалай өзгерді және формаңызды қалай сақтайсыз?
— Ойын мәнерім қатты өзгерген жоқ, тек қорғанысқа көбірек көңіл бөле бастадым. Ал форма сақтау жайында айтсам, ол – ұсақ-түйек нәрселерден тұрады. Бірақ бастысы – жақсы ұйқы, дұрыс тамақтану және денсаулыққа арналған дұрыс тәсілдер. Осыларды ұстансаң, жоғары деңгейде ойнауға болады.
— Ал жас футболшыларға қандай кеңес берер едіңіз? Және «футболшы» деген сөздің мәні сіз үшін жылдар өте қалай өзгерді?
— Жастарға ең бірінші айтарым – инстаграмды өшіріңдер (күледі). Шын айтам, аз ойнап, көп еңбек етіңдер. Уақытты желіге емес, өзіңе жұмсау керек. Тағы бір кеңес – мүмкін болса, шетелге барып ойнап көру. Сол жақта ғана футболшы нағыз кәсіби деңгейге көтеріледі. Басқа орта, басқа көзқарас, басқа тәртіп. Бұл тәжірибе көзқарасты да, өмірге деген түсінікті де өзгертеді.
