Модрич «Реалмен» қош айтысып, «Миланға» бет түзеді
Фото: Getty Images
«Реалдың» ең атақты ойыншысы Лука Модрич мансабын Италияда жалғастыруы мүмкін. La Gazzetta dello Sport мәліметінше, хорват жартылай қорғаушысы «Миланмен» келіссөз жүргізіп жатыр және екі тарап ауызша келісімге келген.
Келісімшарт бір жылға есептеліп, тағы бір маусымға ұзарту мүмкіндігі қарастырылған. Жалақысы — салықтан кейін жылына 3,5 миллион еуро, оған қосымша бонустар да қарастырылған.
«Милан» басшылығы тәжірибелі ойыншының алаңдағы ойынды ғана емес, киім ауыстыратын бөлмедегі тәртіп пен атмосфераны да жақсартатынына сенеді. Модричті тегін алу мүмкіндігі клуб үшін тиімді шешім болмақ — оның «Реалмен» келісімі 30 маусымда аяқталады.
«Корольдік клубпен» қоштасу Модрич үшін клубтар арасындағы әлем чемпионатынан кейін өтеді. Бұл турнир 15 маусым мен 13 шілде аралығында АҚШ-та өтеді. Лука 13 жылда «Реалмен» бірге 28 трофей жеңіп алды, оның ішінде алты мәрте Чемпиондар лигасының жеңімпазы атанды.
