Модрич енді Мессимен бірге ойнауы мүмкін
Фото: El Confidencial
«Реал» сапында 12 маусым бойы өнер көрсеткен хорват жартылай қорғаушысы Лука Модрич мадридтік клубпен қоштасты. Ол өткен демалыс күндері «Сантьяго Бернабеудағы» соңғы ойынын өткізіп, жанкүйерлермен эмоциялық қоштасу сәтін бастан кешті.
DefensaCentral басылымының жазуынша, 39 жастағы ойыншы енді мансабын АҚШ-тың «Интер Майами» клубында жалғастыруы мүмкін. Бұл командада қазірдің өзінде Лионель Месси, Серхио Бускетс, Жорди Альба мен Луис Суарес өнер көрсетеді. Егер келісім жүзеге асса, Модрич бұрынғы басты қарсыластарымен бір командада ойнайды.
Ол кәсіби мансабын әлі аяқтамайды және 2026 жылғы әлем чемпионатына дейін ойнауды жоспарлап отыр. Модрич «Реалмен» бірге 28 трофей жеңіп алып, клуб тарихындағы ең титулды ойыншы атанған.
