Мессидің Майамидегі мұрты бұзылар емес: Игуаинның рекордын жаңартты
Лионель Месси. Фото: Getty Images
7 сәуір күні MLS чемпионаты аясында «Интер Майами» өз алаңында «Торонтомен» кездесіп, матч 1:1 есебімен аяқталды.
Майами клубының жалғыз голын алғашқы таймның соңына таман Лионель Месси соқты. Бұл аргентиналық жұлдыз үшін жай ғана гол емес еді.
Сол голдың арқасында Месси «Интер Майамидің» MLS-тегі ең нәтижелі ойыншысына айналды. Ол 29 матчта 24 гол соғып, 20 рет әріптестеріне пас берген — жалпы 44 нәтижелі әрекет. Осыған дейінгі үздік көрсеткіш Гонсало Игуаинға тиесілі болған (67 ойында 43 нәтижелі әрекет).
Биылғы маусымда 37 жастағы шабуылшы төрт кездесуге қатысып, үш гол соғып, екі мәрте нәтижелі пас беріп үлгерді.
