Футзалдан Қазақстан құрамасы Вьетнаммен кездеседі
Сборная Казахстана по футзалу. Фото: FIFA via Getty Images
Футзалдан Қазақстан құрамасы 8-16 сәуір аралығында оқу-жаттығу жиынын өткізеді. Бұл жиын ФИФА күнтізбесіне сәйкес ұйымдастырылып отыр. Осы аралықта біздің құрама Вьетнам сапарында екі жолдастық кездесу өткізеді. Матчтар 13 және 15 сәуір күндері Хошимин қаласында өтеді.
Жаттығу жиыны 8 сәуірде Астанада басталады. Құраманың бас бапкері бұл жиынға 14 ойыншыны шақыртқан. Қақпада – Лео Игита мен Қанат Жеткірбаев. Алаңдағы ойыншылардың қатарында «Аят», «Семей», «Ақтөбе», «Қайрат» және «Ордабасы» клубтарының ойыншыларымен бірге Ресейдің «Тюмень» клубында доп тебетін Александр Дерябин де бар.
Ұлттық құрама сапында тәжірибелі футзалшылар да, жас буын да бар. Азат Валиуллин, Ақжол Дәрібай, Жахангір Рашит сынды жігіттер алда болатын халықаралық сындарға тас-түйін дайындалуда. Бұл жиын – команданың ойын үйлесімін пысықтайтын жақсы мүмкіндік.
Құрама 10 сәуірде Вьетнамға жол тартады.
