Еурокубоктағы алғашқы сынақ: «Астана» – «Зимбру»
Фото: ФК «Астана»
Футболдан 2025 жылғы маусымның еурокубоктық кезеңі жалғасуда. Бұл аптада елордалық «Астана» Конференция лигасының екінші іріктеу кезеңіндегі алғашқы ойынын Молдованың атақты ұжымдарының бірі — «Зимбру» клубына қарсы өткізеді. Ойын 24 шілдеде Астанада өтеді.
Қазақстандық команда ұлттық біріншіліктегі сәтті ойынымен көзге түсіп жүр. «Астана» Премьер-лигада 18 турдан кейін көш бастап тұр. Соңғы ойында турнир кестесінің төменгі жағында тұрған «Тұранды» 7:0 есебімен ойсырата жеңді. Бұл кездесу бабында жүрген ұжымның еурокубок алдындағы сенімді дайындығын көрсетті. Команда соңғы бес кездесудің үшеуінде жеңіске жетіп, біреуінде тең түсті және бір матчта ғана ұтылды.
Ал Молдова чемпионы емес, бірақ мол дәстүрге ие «Зимбру» да биылғы маусымды сәтті бастап келеді. Жаңа маусымда бес турдан кейін төртінші орында келе жатқан ұжым соңғы үш ойында жеңілген жоқ. Олар сырт алаңда «Дачия-Буюканиді» (3:0) және «Спарта Селеметті» (6:0) жеңіп, өз алаңында «Бэлцьпен» 1:1 есебімен тең түсті. Жалпы, бұл нәтижелер командаға сенімділік сыйлап отыр.
«Зимбру» бапкері Олег Кубарев «Бэлцьпен» болған ойыннан кейін: «Астанада бізге көп уақыт қорғаныста өткізуге тура келеді. Сондықтан бүгінгі матч — қорғаныстық жүйемізді пысықтауға жақсы мүмкіндік болды», — деп мәлімдеді. Оның бұл пікірі алдағы ойында қонақтардың тактикалық ұстанымын анық сипаттайды.
«Зимбру» капитаны Штефан Бургиу болса, қарсыласқа құрметпен қарап отырғанын жеткізді: «Кім айтты «Астана» осал деп? Бұл — Қазақстанның үздік клубтарының бірі. Оларды айналып өту оңай емес. Дегенмен, біз өз мүмкіндігімізді пайдалануға тырысамыз».
Журналистер мен спорт сарапшылары да бұл жұпқа қызығушылық танытып отыр. Sportskeeda.com порталы «Астана» өз алаңындағы сенімді ойынымен жауап матчқа дейін жақсы артықшылық алуға тырысады деп болжайды. Ал ресейлік «Спорт-Экспресс» басылымы: «Молдавиялық команда өткен маусымда ЛК іріктеуінде «Арарат-Армениядан» екі ойында да ойсырай ұтылған. Қазіргі «Астана» мұндай қарсыластан ұпай жібермейді», — деп жазады.
Ойын алдындағы барлық факторларды ескерсек, «Астана» айқын фаворит саналады. Команда тәжірибе жағынан да, ойын сапасы тұрғысынан да алда тұр. Дегенмен, «Зимбру» қонақта күтпеген тосынсый жасауға қабілетті команда екендігін соңғы кездесу нәтижелері көрсетіп отыр. Екі клуб бұған дейін еурокубокта жолықпаған.
Алғашқы матч Астанада өтеді. Қарымта кездесу бір аптадан кейін Молдованың астанасы Кишинэу қаласында ұйымдастырылады.
