Еркебұлан Тоқтар OCTAGON лигасының ең жоғары жалақы алатын спортшысына айналды
OCTAGON лигасының матчмейкері Исатай Елемесов актер әрі ММА жекпе-жек шебері Еркебұлан Тоқтардың турнирлердің танымалдығына қалай әсер еткенін айтып, оның лигадағы ең жоғары гонорар алатын спортшы екенін растады, деп хабарлайды Pin-UpSport.kz.
Исатай Елемесовтің айтуынша, Еркебұлан Тоқтардың OCTAGON ұйымында өнер көрсете бастауы лиганың дамуына жаңа серпін берген. Ол 2021 жылға дейін турнирлерді негізінен ММА-ны жақсы білетін, тұрақты жанкүйерлер ғана көретінін атап өтті. Ал Еркебұланның дебютінен кейін көрермендер қатары айтарлықтай артқан.
«Шынымды айтсам, Еркебұлан келгеннен кейін бәрі жанданып кетті. Бұрын тек ММА фанаттары қараса, кейін шоуға, эмоцияға, тұлғаға қызығатын адамдар да қосылды», — деді матчмейкер.
Оның сөзінше, Еркебұлан қатысқан турнирлердің көрілім көрсеткіші әрдайым жоғары болады. Көп жағдайда бір миллионнан асып түседі. Ал OCTAGON 70 турниріндегі жекпе-жек лига тарихындағы ең жоғары көрсеткішке жеткен — 3,7 миллион қаралым.
«Еркебұлан — бір өзі бүкіл турнирге қызығушылық тудыра алатын сирек тұлға. Көп адам тек соны көру үшін кіреді, бірақ соңында басқа жекпе-жектерді де көріп шығады», — деп түсіндірді Елемесов.
Сондай-ақ ол OCTAGON-дағы гонорар жүйесіне де тоқталды. Матчмейкердің айтуынша, қарапайым спортшылар мен медиа тұрғыда танымал жұлдыздардың табысы арасында айырмашылық бар.
«Көрілім әкелетін, турнирді сататын спортшылар әрқашан көбірек алады. OCTAGON-да топ деңгейдегі файтер үшін 10 мың доллар шамасындағы гонорар — қалыпты жағдай. Ал ірі турнирлерде бұл сома одан да жоғары болуы мүмкін», — деді ол.
Исатай Елемесов лигадағы ең жоғары гонорар дәл Еркебұлан Тоқтарға төленетінін де жасырмады.
«Бұл заңды. Ол — лиганың басты медиа жұлдызы, BMF белбеуінің иегері, OCTAGON-ның бет-бейнесі. Ең бастысы — рекордтық көрілім әкеліп, жаңа аудиторияны тартып жүр», — деп түйіндеді матчмейкер.
Айбар Рысдаулет
Ризабек Айтмұхан PWL турнирінде Магомедхан Магомедовке жол берді
«Реал» келесі маусым алдында құрамды жаңартуды жоспарлап отыр