Елена Рыбакина WTA маусымдық финалында Азия теннисі тарихын жаңадан жазды
Елена Рыбакина. Фото: Пресс-служба ФТК
Қазақстандық теннисші Елена Рыбакина Сауд Арабиясының Эр-Рияд қаласында өтіп жатқан Әйелдер теннис қауымдастығының (WTA) маусымдық финалында Азия теннисі тарихын жаңадан жазды, деп хабарлайды Pin-UpSport.kz. Ол Қазақстан атынан алғаш болып осы беделді жарыстың финалына шыққан спортшы атанды.
Бұл жетістік Азия теннисі үшін де тарихи белес саналады. 1972 жылдан бері өтіп келе жатқан WTA маусымдық финалының шешуші кезеңіне бұған дейін тек екі қытайлық спортшы — Ли На (2013) мен Циньвэнь Чжэн (2024) шыққан еді. Рыбакина осылайша құрлық тарихындағы үшінші, ал Орталық Азиядан алғаш рет финалға жолдама алған теннисші ретінде тарихта қалды.
Жартылай финалда Елена әлемнің бесінші ракеткасы америкалық Джессика Пегуланы жеңді. Тартысты өткен матч екі сағаттан астам уақытқа созылып, 4:6, 6:4, 6:3 есебімен қазақстандық спортшының жеңісімен аяқталды. Бұл табыс Рыбакина мансабындағы маңызды белеске айналып, оның алғаш рет маусымдық финалдың шешуші ойынына шығуына жол ашты.
Финалда Елена әлемнің бірінші ракеткасы, беларусьтік Арина Соболенкоға қарсы күш сынасады. Шешуші кездесу жексенбі күні Эр-Риядта өтеді. Бұл ойын Рыбакина үшін беделді трофейге таласумен қатар, Азия теннисі тарихына есімін алтын әріппен жазатын сәт болмақ.
Айбар Рысдаулет
Қазақстанда он жаңа футбол стадионының жобасы әзірленіп жатыр
Эр-Риядта VI Ислам ынтымақтастығы ойындары ресми түрде ашылды