Бақтияр Зайнутдиновтің мансабына нүкте қойылған жоқ – жарақатынан емделіп жатыр
Бахтияр Зайнутдинов. Фото: Getty Images
Қазақстандық журналист Сеил Қожатай SALE футбол телеграм арнасында «Бешикташ» пен ұлттық құраманың жартылай қорғаушысы Бақтияр Зайнутдиновтің жарақатына қатысты нақты мәліметпен бөлісті. Соңғы күндері оның мансабын аяқтауы мүмкін деген сыбыс жиілеп кеткен болатын.
Журналисттің айтуынша, ол кеше ғана Бақтиярдың өзімен сөйлескен. Наурыздағы оқу-жаттығу жиыны кезінде футболшы сәуірде алаңға оралуды жоспарлаған. Алайда сіңірінің қабынуына байланысты емделу мерзімі ұзарып кеткен. Қазір жазылып шығу үшін кемінде екі апта уақыт қажет екен.
Сеил Қожатай жанкүйерлерге дүрлігудің қажеті жоқ екенін айтып, «мансабын аяқтауы мүмкін» деген алыпқашпа әңгімелерге сенбеуге шақырды. Ол Бақтиярдың әлі де ұлттық құрамаға көмектесетініне сенімді екенін жеткізді.
Айта кетейік, Бақтияр Зайнутдинов биылғы маусымда Түркия Суперлигасында «Бешикташ» сапында 9 ойын өткізген.
