Ата жолын қуған ұл: Ван Нистелройдың ұлы ПСВ-мен келісімшартқа отырды
Лиам ван Нистелрой. Фото: nogomania.com
Нидерланд құрамасының аңызға айналған шабуылшысы Руд Ван Нистелройдың ұлы Лиам алғаш рет кәсіпқой келісімшартқа қол қойды. 17 жастағы футболшы Эйндховеннің ПСВ клубымен 2028 жылға дейін келісім жасасты.
Жас шабуылшы биылғы маусымда ПСВ-нің 17 жасқа дейінгі командасында 30 ойын өткізіп, 20 гол соққан. Бұған дейін ол анасының тегімен — Слэтс болып ойнап келген еді. Бұл шешімді ол академияда көзге түсіп қалмау үшін қабылдаған. Алайда енді ресми түрде атақты фамилиясына қайта оралды.
Айта кетейік, Руд Ван Нистелрой да кезінде ПСВ сапында жарқырап шыққан. Кейін «Манчестер Юнайтед» пен «Реал» клубтарында топ жарған. Мансабын аяқтаған соң ПСВ клубының әртүрлі жас құрамдарын жаттықтырды, 2022-2023 жылдары бас бапкер қызметін де атқарды. Қазір Руд Ван Нистелрой Англиядағы «Лестер» клубын баптайды.
