Александр Меркель Қазақстан құрамасына қайта оралу ниеті туралы айтты
Фото: Heracles
Жартылай қорғаушы Александр Меркель «Amanvibe» Youtube-арнасына берген сұхбатында Қазақстан құрамасын таңдауы жайлы, «Астана Аренадағы» дебюті туралы және ұлттық команда сапына қайта қосылу ниеті жөнінде пікір білдірді, деп хабарлайды Pin-UpSport.kz. Футболшы бұл шешімді тез әрі саналы түрде қабылдағанын айтты.
Меркельдің сөзінше, Германияның жасөспірімдер құрамаларында ойнаған кезде Қазақстан атынан шығу мәселесі көтерілмеген. Ол Германияда жаттығып, сол жерде өнер көрсеткендіктен, басқа нұсқа қарастырылмаған. Алайда туған елінен шақырту түскен сәтте ұзақ ойланбастан келісім бергенін жеткізді. Ол мұны өз отанын халықаралық деңгейде таныту мүмкіндігі ретінде қабылдап, ерекше мақтаныш сезімін бастан өткергенін атап өтті.
Футболшы «Астана Аренадағы» алғашқы ойынын да еске алды. Шотландия құрамасына қарсы өткен матчта Қазақстан 3:0 есебімен жеңіске жетіп, Меркель нәтижелі пас авторы атанған. Оның айтуынша, сол кездесуде әкесі мен әжесі бастаған туыстары трибунада болып, бұл күн оның мансабындағы маңызды әрі есте қаларлық сәттердің бірі болған.
Қазіргі уақытта Меркель клубында легионер мәртебесінде өнер көрсетіп жүр. Болашақта құжаттық мәселелерді реттеп, Қазақстан азаматтығын алуға үмітті екенін айтты. Ол алдымен клуб сапында тұрақты нәтиже көрсетіп, кейін ұлттық құрама деңгейінде ойнауға дайын екенін дәлелдеуді мақсат етіп отыр.
Айбар Рысдаулет
Абат Айымбетов «Петролул» сапындағы алғашқы матчын өткізді
Төрт алтын: қазақстандық балуандар Албаниядағы турнирде қанша медаль жеңіп алды