Данилина US Open жарысының үшінші кезеңіне өтті
Фото: VCG via Getty Images
Қазақстандық Анна Данилина сербиялық әріптесі Александра Круничпен жұптасып, АҚШ ашық чемпионатының үшінші айналымына жолдама алды, деп хабарлайды Pin-Upsport.kz.
Турнирдің тоғызыншы нөмірлі дуэті екінші кезеңде румыниялық Моника Никулеску мен латвиялық Анастасия Севастоваға қарсы өнер көрсетті. Бірінші партияда Данилина – Крунич қос брейк жасап, жеңісті 6:2 есебімен түйіндеді.
Екінші сетте қазақстандық-сербиялық жұп 5:1 есебімен алға шықты. Қарсыластар бір брейк қайтарғанымен, шешуші сәтте Данилина мен Крунич басым түсіп, матчты тағы да 6:2 есебімен аяқтады. Ойын бір сағат тоғыз минутқа созылды.
Бұл кезеңде Данилина – Крунич үш эйс орындап, он брейк-пойнттың бесеуін пайдаланды. Ал Никулеску – Севастова екі эйс пен бір ғана брейкке қол жеткізді.
