Роналду Джорджина Родригеске 5 миллион долларлық сақина сыйлады
Криштиану Роналду. Фото: Getty Images
«Әл-Наср» клубы мен Португалия құрамасының 40 жастағы шабуылшысы Криштиану Роналду сүйіктісі Джорджина Родригеске құны шамамен 5 миллион доллар тұратын неке сақинасын сыйға тартты, деп хабарлайды Pin-UpSport.kz.
The Sun басылымы People журналына сілтеме жасап, Лондондағы 77 Diamonds зергерлік үйінің басқарушы директоры Тобиас Корминд бұл әшекейді атақты Тейлор–Бёртон бриллиантымен салыстырды. Салмағы 69,42 карат болатын гауһарды кезінде Элизабет Тейлорға Ричард Бёртон сыйлаған еді. Сарапшының айтуынша, Роналду сыйлаған сақинаның бағасы шамамен 5 миллион доллар.
Бұған дейін Джорджинаның әлеуметтік желідегі ақ көйлекпен және қолында сақинасы бар суреттері жұптың құпия түрде үйленгені туралы сыбыс тудырған. Роналду мен Родригес 2016 жылдан бері бірге өмір сүріп, бес баланы тәрбиелеп отыр.
