АПЛ футболшысы Дастан Сатпаевты әлемдегі ең талантты жас ойыншы деп атады
Фото: КФФ
Ағылшын Премьер-лигасында доп тебетін ганалық шабуылшы Антуан Семеньо жуырда берген сұхбатында «Челсидің» жас ойыншысы Дастан Сатпаевты ерекше атап өтті, деп хабарлайды Pin-UpSport.kz.
Журналист «Қазір әлемдегі ең талантты жас футболшы кім?» деп сұрағанда, Семеньо бастапқыда нақты есім айта алмай кідіріп қалды. Кейін сәл ойланып: «Жақында «Челсиге» ауысқан бір жігіт бар еді… Сатпаев? Иә, иә, дәл өзі», – деп жауап берді.
2024 жылдың ақпан айында «Челси» 16 жастағы Сатпаевты «Қайраттан» 4 миллион еуроға сатып алған. Бұл – Қазақстан чемпионатындағы рекордтық трансфер. Ресми түрде ол 2026 жылдың тамызында, 18 жасқа толған соң Англияға қосылады.
Өткен маусымда Дастан Қазақстан Премьер-лигасында 15 матч өткізіп, 8 гол соқты, 4 нәтижелі пас берді. Сондай-ақ, ел құрамасында 3 ойынға қатысты.
