Таразда туған шабуылшы Қазақстан құрамасына шақырту алуға қарсы емес
Ислам Евлоев
Ресейлік «Муром» клубының шабуылшысы Ислам Евлоев Қазақстан құрамасына ойнауға қарсы емес екенін жеткізді. Бұл туралы ол Legalbet.kz порталына берген сұхбатында айтты.
«Қызығушылық бар, әрине. Егер сондай ұсыныс түссе, ойланып көрер едім. Өйткені Қазақстан – отбасымызға бөтен емес», – деді футболшы. Айта кетейік, Евлоев 1999 жылы Таразда дүниеге келген. Кейін отбасымен бірге Мәскеуге көшіп, футболдағы жолын сол жақта бастаған.
Ол бұған дейін «Долгопрудный», «Сатурн», «Рязань» және тағы басқа клубтарда ойнаған. 2024 жылдың қыркүйегінен бері Ресейдің екінші лигасында өнер көрсететін «Муром» командасының намысын қорғап жүр. Биылғы маусымда 17 матч өткізіп, бір гол соқты және бір нәтижелі пас берді.
Transfermarkt порталы оның трансферлік құнын 100 мың еуроға бағалап отыр.
